Kigingi yaburiwe ngo akure umukobwa ubwiza bwiwe bwagereranijwe n’inzahabu mw’ibarabara, ngo amushire mu nzu.
Mu gihe yariko yipfuriza isabukuru nziza umukunzi wiwe Marina, Kigingi yahavuye yibirwa akabanga n’abakurikirana urubuga rwiwe rwa Facebook. Aho hari igenekerezo rya 1 rusama 2019.
Abakurikiranira hagufi ibikorerwa ku rubuga rwa Facebook rwa Mugenzi Alfred Aubin benshi bazi nka Kigingi bamubwiye ko yomera magabo ku mukunzi wiwe.
Kigingi akaba yahanuwe gukura mw’ibarabara uwo mukunzi wiwe noneho akamushira mu nzu, muri make akamutwara. Bakaba bashobora kuba bamuvuniye akagohe ko n’abandi bamuraba ryiza, ubona ko ubwiza bw’uwo mwigeme w’umurundikazi babugereranije n’ibuye ry’agaciro ritaboneka ahariho hose, inzahabu.
Mukibuka ko Kigingi yavuze ko yikundira abakobwa banini banini, kandi atari ivyavuba, ahubwo ngo ari ivya kera cane. Igituma ngo nuko bafise ivyiza vyinshi birimwo ukutagorana, ukutayerera, ukugira umutima mwiza n’ibindi.
