Umukinyi wo hagati w’intamba mu rugamba hamwe na Istanbul Basaksehir yo muri Turquie Ndayishimiye Youssuf batazira Nyange , yemeye gufasha umugwi Aigle Noir Cs na Tigre Noir mu bijanye n’imyambaro yose izokoreshwa mw’ihiganwa rya Primus League 2022-2023.
Hari kuri uyu w’Imana waraye uheze igenekerezo rya 21 Myandagaro 2022, aho umugwi Flambeau du Centre wari waramutse uhimbaza umusi mukuru wabo wo kwigina igikombe ca Primus League batahukanye mw’ihiganwa ry’umwaka w’i 2021-2022. Ibirori vyatanguriye ku kibuga Ingoma biherera ku rugo rw’uwurongoye umugwi Flambeau du Centre umugwizatunga Kazohera Vénerand.
Mw’ijambo Honorable Réverien Ndikuriyo yatanguje imigwi ya Aigle Noir na Tigre Noir Warriors yashikirije , yavuze y’uko umukinyi Youssuf Nyange yabemereye y’uko mw’ihiganwa ryo muri uno mwaka y’uko azokwambika imigwi ya Aigle Noir na Tigre Noir.
Akaba yagize ati: “Iyi Saison yose nta kintu nakimwe Aigle Noir Cs na Tigre Noir Warriors bazokwambara kitavuye kwa Ndayishimiye Youssuf Nyange”.
Vyose ama Training, ama Maillot , amasogisi , ibirato uharuye bizotwara amafaranga ibihumbi 10 vy’amadorari y’amanya America yatanzwe n’uwo mukinyi .
Mwomenya ko Ndayishimiye Youssuf Nyange yatwawe i Buraya n’umugwi Aigle Noir Cs , muri uwo mugwi yahembwa ibihumbi amajana atatu y’amarundi (300,000FB) , ariko muri kino gihe asanzwe ahembwa amadorari ibihumbi mirongo umunani vy’amanya America ( 80,000 $ ) mu marundi ni imiriyoni 250.
