Mu gihe Big Fizzo afise ikibazo c’indirimbo ziwe zigize imisi zikurwa kuri YouTube, Ndabizi iheruka gusohoka ngo irakwiye gukwiza Views 1,000,000 none isemo ryo kuyironderera izo Views ryamaze gutangura. Yassin yerekanye uko uriko urakorwa, n’ibisabwa ngo abafana ba Big Fizzo basabwa ngo babahemvye Kuri iryo semo bihaye.
Ironderwa rya ya 1 Millions view Kuri ya Ndirimbo Ndabizi ya Big Fizzo, iraremvye kuko imikemyuro irabandanya gukorwa n’abafana kumwe n’aba Promoter begamiye Kuri Mugami Desire.
Mu misi ku bakurikirana runo rubuga rwacu, twari twababwiye ko Yassin wa mu Promoter adacikwa n’agakaciye kose Kuri Big Fizzo, yari yamenyesheje ko umugambi wo kuronderera 1,000,000 views Indirimbo Ndabizi ya Big Fizzo watanguye.
Umugambi yari yashize ahabona ko agiye gushinga urubuga rwa Whatsapp rw’abo bumva kumwe ibijanye no kuronderera 1M Views iyo ndirimbo, watanguye gushirwa mu bikorwa.
Akoresheje imbuga asanzwe akoresha, yamenyesheje ko abazoja muri uwo mugwi wa Whatsapp w’abafana b’inkoramutima, ngo bategerezwa kwerekana ico bariko baramarira uwo muririmvyi muri ino misi abarizwa ku mugabane wa buraya.
Uwo muntu hatazwi ko ari umuhungu canke umukobwa yamenyesheje ko umuntu ashaka Kuja muri uwo mugwi azoshira Numero ziwe za Whatsapp muri commentaire y’indirimbo Ndabizi ya Big Fizzo ku rubuga rwiwe rwa YouTube.
Yassin muri ubwo butumwa yavuze ko muvyo bakeneye muri uwo mugwi n’abakiri bato, bakoreshe imbuga ngurukanabumenyi cane Kandi baguma bari update, kuko ngo muvyo bariko barashaka gushikako bakoresheje urwo rubuga ngo n’ukugira barabire hamwe uko Hobaho impinduka zikomeye ku mbuga za Big Fizzo.
Hampande ya za Numero bashira muri commentaire y’indirimbo Ndabizi ya Big Fizzo, ngo hari ibindi bintu 3 utegerezwa kuba ukwije. Kimwe n’uko utegerezwa kuba uri umu fans w’ukuri wa Big Fizzo, ukaba Kandi urajwishinga n’iterambere ryiwe, ubwa 3 ukaba umukurikirana ku mbuga ngurukanabumenyi asanzwe akoresha nka Facebook, Instagram, TikTok na Twitter eka mbere na za mbuga ngurukanabumenyi agurishako Indirimbo.
Iyi ndirimbo bariko baronderera 1 Millions views, ikaba uno musi igeze ku bamaze kuyiraba bagera ku 221,000 mu mezi arenga gato 2 isohotse. Ubu rero tukibaza nimba na Big Fizzo atoba nawe yinjiye muri rya higanwa ryo kuronka ama Views menshi kandi akatari gake akunze kuvuga ko mu gihe abandi baja kugura ama Views kugira bakwize ama Miliyoni we ngo azokwemera agende buke buke, aze aronka duke duke ariko atinde ashike.
Ku batabimenye, Big Fizzo amaze imisi ari mu bibazo vy’ama Video yiwe akurwa ku rubuga rwa YouTube rwiwe, akaza araja gusubizwako Kandi. Imvo ngo yoba ari inzu bari basanzwe bakorana mu gukwirakwiza indirimbo ziwe ku mbuga ngurukanabumenyi zidandaza umuziki, yazikurishijeko kuko bavavanuye, ubu akorana n”uwundi.
Big Fizzo akaba ari mu baririmvyi 2 ba mbere hano iwacu bafise urubuga rwa YouTube rukurikirwa na benshi, kuko amaze gukwiza abarenga 111,000 bamukurikira, uwa mbere akaba Ari Sat-b ariko arababa 200,000. Ataravye neza ariko umuririmvyi Double Jay yaciye mu minwe yiwe ashobora kumucako, kuko nawe ariko arasatira 90,000 Kandi Indirimbo ziri inyuma zihagaze neza zishobora kumuronsa abatari bake biyongereye Kuri ico gitigiri.
