Leta zunze ubumwe za Amerika kuri uyu wa gatanu, igenekerezo rya 11 Nyakanga 2026, baribuka imyaka 25 iheze habaye ibitero vy’iterabwoba vyahitanye hafi abantu 3,000.
Ivyo bitero vyabaye ku wa 11 Nyakanga 2001, aho abantu 19 bari bafise imigenderanire n’umuhari wa Al-Qaida bafashe indege zine zitwara ingenzi, bazikoresha mu gutera ahantu hatandukanye muri Amerika.
Indege zibiri zaratewe ku nyubakwa za World Trade Center i New York, izari zizwi cane nka Twin Towers. Izo nyubakwa zarasenyutse inyuma y’aho izo ndege zizigongeye.
Indege ya gatatu yagonze inyubakwa ya Pentagon, ari yo nyubakwa ikorerwamwo n’igisirikare ca Amerika, iri hafi y’umurwa mukuru Washington. Abantu 184 bari muri iyo ndege no muri Pentagon barahasize ubuzima.
Indege ya kane yaguye mu murima wo muri Pennsylvania, inyuma y’uko ingenzi zari muri yo zigerageje kubuza abari bayifashe gushika ku kindi kibanza bari bateguye gutera.
Muri rusangi, ivyo bitero vyahitanye abantu 2,977, hadaharuwe abo mu bari babikoze. Vyahinduye cane ubuzima bwa Amerika, poritike mpuzamakungu hamwe n’ingingo z’umutekano kw’isi yose.
Perezida Donald Trump yifatanya n’abibuka abahitanywe
Kuri uyu musi wo kwibuka ivyabaye, Perezida Donald Trump aritaba umuhango wo kwibuka abahitanywe n’ibitero wabereye kuri Pentagon. Ni umwaka ugira kabiri wikurikiranya yitabiriye uwo muhango kuri Pentagon.
I New York, amazina y’abantu bose bahasize ubuzima arasomwa mu birori vyo kwibuka, mu gihe abandi bategetsi ba Amerika bitabira imihango ibera ku bibanza bitandukanye vyagizweko ivyo bitero. Umuyobozi wungirije wa Amerika, JD Vance, yitezwe mu muhango wo kwibuka i New York, hamwe n’abahoze ari ba perezida ba Amerika. No muri Shanksville, Pennsylvania, aho indege ya kane yaguye, harateguwe umuhango wo kwibuka abahitanywe.
Umusi utazokwigera wibagirwa
Imyaka 25 inyuma y’ivyo bitero, Abanyamerika baracibuka ababuze ubuzima, eka n’abari mu miryango yabo. Ku bw’abantu benshi, igenekerezo rya 11 Nyakanga 2001 ryabaye umusi wahinduye amateka ya Amerika n’ay’isi yose.
Inyuma y’ivyo bitero, Amerika yatanguje intambara n’ibikorwa bikomeye vyo kurwanya iterabwoba, cane cane muri Afuganisitani na Iraki. Ivyo vyatumye poritike mpuzamakungu n’imigenderanire hagati y’ibihugu bihinduka cane mu myaka yakurikiye.
Uyu musi rero, Amerika irahagarara kugira yibuke abahitanywe, yubake icizere c’amahoro kandi ibandanye kwibuka ivyabaye ku wa 11 Nyakanga 2001.
