Ku ndwi ya 18 mw’ihiganwa rya Primus ligue Burundi, kuri uyu w’Imana igenekerezo rya 02 Ruhuhuma 2025 ku kibuga Urunani, umugwi Vital’o wari wakiriye Musongati wo mu ntara ya Gitega urukino ruza kurangiye ari igitsindo kimwe ku kindi.
Umugwi Vital’o watanguye urondera igitsindo ariko biranka niho ku munota wa 40 umukinyi w’umunyegori Haïle Shalom yakorera ikosha umukinyi w’umugwi Musongati Darcy Nshimirimana, Haïle Shalom aca yerekwa ikarata itukura. Umugwi Vital’o ntiwahagaritse kurondera igitsindo ariko urahebura.
Igice ca mbere c’urukino carangiye imigwi yose inganya ubusa ku bundi. Bamaze kuva mu karuhuko k’igice ca mbere, umugwi Vital’o ubona igitsindo kivuye k’umukinyi w’inyuma Yakubu Uwimana ahaye umupira Jordan Kessy Nimbona, uwo nawe aca ahereza Dieume Sisine Eboma babona kubona igitsindo ca mbere kuri Vital’o FC.
Umugwi Musongati ntiwacitse intege kuko wagumye urondera igitsindo urahebura kugeza k’umunota wa 94 mu gihe bari bongeye iminota 5. K’umupira watewe uvuye mu mfuruka y’ikibuga uca ku bakinyi ba Vital’o uca ushikira Patrick w’umugwi Musongati aca abona igitsindo co kugombora. Ubwo nyene bagiye guhererekanya umuhagarikizi Rodrigue aca arangiza urukino,ruca rurangira ari igitsindo kimwe ku kindi.
Ubwo umugwi Vital’o inyuma yo kubura amanota atatu, waciye uguma mu kibanza c’icumi wari usanzwe urimwo. Mu nkino 18 uwo mugwi umaze gukina, ufise amanota 26.
Tubibutse ko mu mwaka w’inkino wa 2023-2024, umugwi Vital’o FC niwo wari yatahukanye iryo higanwa rya Primus ligue.
