Mu bihugu bimaze kwitaba iri ihiganwa, harimwo ibihugu vyo muri Afrika yo mu buseruko ari vyo nka Repubulika Iharanira Demokarasi ya Congo (RDC), Tanzaniya hamwe na Uganda, vyose bikaba bifise intumbero yo kwerekana ico bishoboye muri iri higanwa ryo ku mugabane wa afrika. Nk’uko biri mu mwihwezo w’umumenyeshamakuru w’inkino Vincent Nkunzimana,iyo migwi ihuriye ku ntumbero imwe: gukora neza no gushika kure hashoboka, n’aho urugero ruba rutandukanye.
RDC: uburambe bukomeye n’intumbero isobanutse
Ku bwa Vincent Nkunzimana, umumenyeshamakuru w’inkino kuri Radiyo Indundi Culture, RDC ni co gihugu co muri Afrika y’ubuseruko gifise amahirwe menshi yo gushika kure muri CAN 2025. Abakinyi bayo, bazwi kw’izina ry’Intambwe (Léopards), bafise kahise keza muri iryo higanwa, bakaba baratwaye igikombe incuro zibiri:
– mu 1968 batsinze Ghana ibitsindo 1-0,
– mu 1974 batsinda Zambiya ku mipira y’imiterekano(penalty).
Mw’ihiganwa riheruka ryabereye muri Côte d’Ivoire mu 2023, RDC yashitse muri kimwe ca kabiri gishira icanyuma (demi-finale) aho yakuwemwo n’igihugu cakiriye iryo higanwa arico Côte d’ivoire, hanyuma iratsindwa.
Mu muce D, Intambwe za RDC (Léopards) zirikumwe n’ibuhugu nka Sénégal, Bénin na Botswana. Vincent Nkunzimana arashimika ko naho Sénégal ari umugwi ukomeye cane, RDC ishobora kwizigira bamwe mu bakinyi bayo bafise uburambe mu mateka ya CAN kugira bashobore gushika mu bice vya nyuma vy’ihiganwa (quart de finale), mbere igashobora no gutwara igikombe ku ncuro igira gatatu.
Uganda:Nayo ifise ayahe mahigwe muri iryo higanwa
Uganda, ni ikindi gihugu co muri Afrika y’ubuseruko kizokwitaba CAN muri Maroc, gifise amateka muri rino higanwa. Iki gihugu, kizwi kw’izina rya Cranes, carigeze gukina urukino rwa CAN mu 1978, ariko kiratsindwa na Ghana ibitsindo 2-0.
Ku bwa Vincent Nkunzimana, ayo mateka yerekana ko Uganda ifise ubushobozi bwo gutangaza bimwe mu bihugu biri mu muce umwe, n’aho itigeze itwara igikombe.
Muri iki gikombe ca CAN 2025, umurwi wa Uganda ufise abakinyi benshi bakina mu gihugu hagati, ivyo bikaba bishobora kuwugora mu guhangana n’irwi ifise abakinnyi bakina mu mirwi mpuzamakungu. Ariko kandi, kubera kumenyerana n’ugutunganya neza umurwi ni ivyiza Uganda ishobora kwifashisha kugira irengere ije mu kindi gice, mbere inatangaze iyindi mirwi no mu bice bikurikira.
Nkunzimana aramenyesha ko umugwi ugizwe ahanini n’abakinyi bakina mw’ihiganwa ryo mu gihugu hagati bishobora kuba intambamyi ikomeye mu guhangana n’imigwi ifise abakinyi bakina mu mirwi y’i Buraya canke muri Afrika ya ruguru.
Tanzaniya: irondera intsinzi ya mbere
Tanzaniya, izokwitaba CAN ku ncuro igira kane, ntirigeze irenga mu nkino za mbere kandi ntiraronka n’intsinzi n’imwe mu mateka yayo muri iryo higanwa. Ku bwa Nkunzimana, ivyo bituma Tanzaniya iharurwa nk’umugwi utegerezwa kwemeza ko ufise ico ushoboye.
Iki gihugu gifise ahanini abakinyi bakina mu gihugu hagati, aho ihiganwa ryabo riri ku rugero rwiza mu karere, ariko ikaba itaragera ku rwego rwo hejuru ugereranije n’imigwi ikomeye yo muri Afrika.
Tanzaniya iri mu muce wa C, hamwe na Uganda, Nigeria na Tunisie, bikazoyisaba inguvu nyinshi kugira ironke amanota yayo ya mbere. Nkunzimana ashimika ko ugutunganywa neza mu mikenyuro y’umupira uburyo ikina (tactique), kwitegura mu mutwe n’ukwigira ku vyabaye mu mahiganwa aheruka bizoba ivyakamaro cane mu kurondera umusaruro mwiza.
Ingorane n’ivyipfuzo vy’Afrika yo mu Buseruko muri CAN 2025
Mu rusangi,imigwi yo muri Afrika yo mu Buseruko ifise ingorane zisa: abakinyi benshi bakina mu mahiganwa yo mu gihugu hagati adafise urwego rwo hejuru, bigatuma batabona akaryo gakwiye ko gukina ku rwego rushimishije
Vincent Nkunzimana abona ko RDC ari co gihugu gihagaze neza kurusha ibindi kugira gishike kure muri iryo higanwa, mu gihe Uganda na Tanzaniya bizofata intumbero yo kwerekana ko navyo bifise aho bizoshika.
CAN 2025, izokwugururwa n’urukino ruzohuza Maroc na Comores i Rabat, izoba ari idirisha ryiza ku bihugu vyose vya Afrika
Afrika yo mu Buseruko: amahirwe n’inyota yo kwiyerekana muri CAN 2025
Naho ingorane zitabura, Vincent Nkunzimana arashimika ko amateka, uburambe n’inyota yo gutsinda bishobora gufasha imirwi yo muri Afrika yo mu buseruko kurenga ivyo abantu benshi batizera. RDC, ifise amateka akomeye n’uburambe, iboneka nk’igihugu gishobora gukora urugendo rwiza muri CAN. Uganda na Tanzaniya na vyo bishobora kwifashisha ubumwe n’inguvu z’abakinyi kugira bitangaze ibindi bihugu.
Rero, CAN 2025 izobera muri Maroc itanga akaryo kadasanzwe ku bihugu vya Afrika yo mu buseruko ko gusiga ikimenyetso gihoraho mu mupira w’amaguru wa Afrika.
