Umukinyi w’umurundikazi asanzwe akina mu gihugu ca Tanzania mu mugwi Simba Queens Asha Jaffari yaraye abiciye biracika.
Hari kuri uyu wa gatatu igenekerezo rya 22 Nzero 2025 ku kibuga ca KMC Complex aho umugwi Mlandizi wari wakiriye umugwi Simba Queens mu rukino rw’indwi igira 9 rw’ihiganwa ryo mu cicaro ca mbere ku ruhande rw’abigeme mu gihugu ca Tanzania. Urwo rukino rwarangiye Simba Queens itsinze ibitsindo 11-0 Mlandizi.
Umukinyi w’Intamba mu rugamba z’abigeme Asha Jaffar yinjije ibitsindo bitatu (3) wenyene muri urwo rukino aca atahana umupira.
Simba Queens gushika muri kano kanya n’iyo ifata ikibanza ca mbere mw’ihiganwa rikuru ryo mu gihugu ca Tanzania ku ruhande rw’abigeme n’amanota 25.
Mwomenya ko Asha Jaffar aheruka gutumwako mu mugwi nserukiragihugu w’Intamba mu rugamba w’abigeme mu ntumbero yo kwitegurira igihugu ca Burkina Faso muri za nkino zo kurondera itike yo kwitabira igikombe ca Africa c’umwaka wa 2026.
