Mw’ishirahamwe ry’abaririmvyi “SOVAB Agashitsi” basaba ko inyugu bari baremerewe n’ikigo c’igihugu kijejwe gukingira ibikorwa mvabwenge ku bikorwa vyabo mu 2023 boyihabwa. Iryo shirahamwe riranegura ko kuva uwo muhango utanzwe indirimbo zabo zikivuzwa mu bibanza bitandukanye ariko ataco barigera baronka nk’inyungu.
Umukuru w’iryo shirahamwe Célestin Niyoyandemye avuga ko ivyo biheza bigaca intege abanyamyuga baba ab’ubu n’abo muri kahise. Atera akamo inzego nshasha ziheruka gushingwa mu gihugu gufata ikibazo cabo mu minwe.
Ariko rero n’aho haheze imyaka hafi 20 abaririmvyi bemerewe iyo nyungu basaba kuri ivyo bikorwa vyabo, gushika n’ubu nta tegeko ritomora neza iyo nyungu m’uburyo bw’amafaranga rirashingwa na Reta. lco gisata gushika n’ubu kiracagengwa n’ibwirizwa ryo mu 2005. Radio Indundi Culture yashimye kugaruka ku ngingo zimwe zimwe ziza nk’izikingira ibikorwa mvabwenge.
Kuwa 27 Ruheshi 2023 mu nama yatunganijwe n’ico kigo OBDA yahuza abaririmvyi na bene ubunywero, amahoteri, inyubakwa zikorerwamwo amanama, izitunganirizwamwo imiziki n’izukumweramwo imishatsi ,amazu asanzwe ahanini avuzwamwo imiziki, uwurongoye ico kigo yatanganje ko abo bose babwirizwa kuriha amafaranga n’aho atazwi igitigiri cayo kugira asahirize abaririmvyi kuri ivyo bikorwa mvabwenge vyabo.
Claudette Mukankuraga yavuze ico gihe ko amafaranga azokwegeranywa n’ico kigo hama ahabwe abo bakora ivyo bikorwa mvabwenge na cane cane ku bandikishije ivyabo muri ico kigo mu gihe itegeko rigenga gukingira ivyo bikorwa mvabwenge mu Burundi ari iryo kuwa 30 Kigarama umwaka w’i 2005 nta kigabane canke ingingo igaruka kw’itozwa ry’ayo mafaranga.
Iyo ikaba intambamyi y’ishirwa mu ngiro ry’uyo mugambi rigaruka ahanini ku bwoko bw’ivyo bikorwa na ryari umuntu yitirirwa igikorwa ivyo tukabisanga mu ngingo za 4 n’u 8 z’iryo tegeko. Ikigabane ca VL mu ngingo ya 22 ho herekanwa ingene ico gikorwa mvabwenge gikingirwa hisunzwe izina rya nyeneco ubwiza bwaco hamwe n’imyaka kibwirizwa gukingirwa aho igera kuri 50.
Ingingo ya 93 yo iza yerekana ingene abigana ibikorwa mvabwenge bahanwa, iyo ngingo ivuga ko uwufashwe yiganye igikorwa kanaka ahanishwa umunyororo w’ugupfungwa amezi ari hagati ya 3 n’imyaka 2 canke akarihishwa ihadabu riri ringana n’amafaranga y’amarundi ari hagati y’ibuhumbi 10 n’umuriyoni umwe.
Izo ngingo zose zishirwa mu ngiro n’umushikiranganji muvyo ajejwe harimwo imicokama nk’uko vyerekenwa n’ingigno ya 25 y’iryo tegeko.
