Ababurana hari aho batamenya ibiringo ntabanduka vyo kwungururizako imanza biturutse ku bumenyi buke. Abahuza bo ku mitumba barakwiriye gukarihizwa ubumenyi.
Buramatari w’intara ya Kirundo Victor Segasago amenyesha ko hibonekeza imanza nyinshi zitaratorerwa inyishu biturutse ku bumenyi buke bw’ababurana kuko hari aho usanga batazi ibiringo vyo kwungururizako imanza ingene biba bingana mbere n’uko akenshi igisata c’iyungururizo usanga kitari mu ntara ya Kirundo ibiheza bikagora bamwe mu banyagihugu bipfuza kwunguruza imanza biturutse ku buryo buke baba bafise.
Segasago asaba ubushikiranganji mu vyo bujejwe harimwo ubutungane kuza barashika kwakira iyo myitwarariko y’abanyagihugu be n’ugukarihiriza ubumenyi abahuza bo ku mitumba kuko hari aho bibagora gutandukanya imanza z’ivyaha hamwe n’imanza z’amatati.
Umunyamabanga ntayegayezwa Mu bushikiranganji bw’ubutungane Hajayandi Gervais amenyesha ko bashizeho insamirizi kugira ntihagire uwubura uburenganzira bwiwe kubera kutamenya. Ku kijanye no guteba gushika ku matongo gushira mu ngiro imanza ziba zaracitse, Hajayandi asigura ko habaye ikibazo kijanye n’ibura ry’ibitoro ariko ko bagiye kubihinyanyura vuba.
