Umuririmvyi w’umurundi Great Brown avuga ko indirimbo yasohoye yise “uratesa“ yayikoze n’umutima umwe; mu kuyandika yafatiye kuvyo yariko aracamwo muri ico gihe.
Mu kiganiro yahaye insamirizi indundi culture kuwa kabiri itariki 1 Ndamukiza uyu mwaka wa 2025 ashikiriza ko yatanguye umuziki mu mwaka w’2014 ari mu mugwi “love Team“, mu nyuma uyo mugwi urasambuka aca aja gukora ari wenyene; niho yasohoye indirimbo yise “Enegry“ aca aronka umugwi umufasha nka “management“ niho guca asohora indirimbo “Carolina”.
Uyo muririmvyi Ndushimirimana Méthode azwi nka Great Brown amenyesha ko ubuzima bw’umuziki bugoye iyo ukoze uri wenyene ariko iyo uronse ababigufashamwo uca woroherwa mu kazi. Uca ukora cane mu kwandika no gusohora indirimbo. Brown agira ati: ”Mu muziki hariho intambamyi zotuma ucika intege ariko namba ufise ico ushaka gushikako nturaba amajambo y’abantu urakora hama ibikorwa bikivugira”.
Arashimira abantu bose bagize ico bakoze kugira agere aho ageze ubu. Aha avuga nk’umuririmvyi Akes Don we yamubonye ubwa mbere akiririmba Hip pop hanyuma akamubwira ko afise impano bica bimutera kubandanya umuziki.
Méthode avuga ko afise indirimbo nyinshi atarasohora ariko vuba agiye gukora ikindi gikorwa kugira agume aryohera abankuzi biwe.
