Bamwe mu barimyi b’umuceri barimira mu mwonga wa Murembwe bavuga ko muri ino myaka ico giterwa ataco bakigikuramwo kubera imyuzura iterwa n’urwo ruzi ruca ahari imirima yabo.
Ivyo biba mu gihe imvura iba yaguye ari nyinshi igatuma uruzi Murembwe rwuzura rugaca rusesera mu mirima irwegereye. Ico gihe abarimyi ntaco baheza ngo bahamburire kuku imisenyi iba yafutse iyo mirima y’umuceri ntibabe bacimbura. Bavuga ko benshi muri bo baba barasavye ingurane kugira barime uwo muceri, ubu bakaba bipfumbereje babuze ayo bacira n’ayo bamira. Imyaka iriko irababa itatu ibintu vyama bimeze uko bakagira amakenga kuko uko imyaka igenda irengana ariko ibintu bitera vyunyuka. Gushika ubu amahegitare arenga mirongo ibiri y’umuceri niyo amaze kuvogerwa n’ayo mazi.
Kugira abo barimyi bafise amatongo hafi y’urwo ruzi Murembwe basubire kuronka umwimbu haba kuri ico giterwa c’umuceri co kimwe no kubindi biterwa biharimwa nk’ibigazi, imboga, inyanya n’ibindi abo barimyi babona ko ababijejwe bocira iyindi nzira urwo ruzi kugira agabanure umuvuduko.
