Abadandaza bakoresha ikivuko ca Rumonge barasaba ko ico kivuko muri kino gihe kiri munyubakwa rusangi zatewe n’amazi y’ikiyaga Tanganyika ko cosanurwa. Ubu bavuga ko batagira aho bashikiza ibidandazwa vyabo kuko hari inyubakwa imwe gusa babishikizamwo iyo amazi yagabutse.
Nk’uko biboneka ahari ico kivuko inyubakwa nka zose zaratewe n’amazi y’ikiyaga Tanganyika. Abazana ibidandazwa mu Burundi babipakururiye kuri ico kivuko ntibaheza ngo boroherwe kugira baronke aho babishikiza uretse inyubakwa imwe rudende naho nyene aho hakaba ari mu gihe haba hatse izuba amazi akagabanuka ibiheza bikabatera uruhombo.
Umwe muri abo badandanza avuga ko ibidandazwa biba vyapakururiwe muri ico gihangare biheza bikononekara mugihe abadandaza atari bake bahagiriye uruhombo. Ufatiye nko kuwuba afise umutahe w’imiriyoni 10, ugasanga agize uruhombo rwababa imiriyoni zitanu kumvo z’ukubura ububiko bw’ibidandazwa.
Onesime Niyukuri avugira ubushikiranganji muvyo bujejwe harimwo gutwara abantu n’ibintu avuga ko umugambi wo gusanura ico kivuko wari uhasanzwe ariko ko wanigiwe mu meshi n’iryo duga ryamazi y’ikiyaga Tanganyika.
Yamara arahumuriza abakoresha ico kivuko ko vuba bagiye gutanga isoko ku bahinga boshobora kugisanura. Ahamagarira abasanzwe bakoresha ico kivuko muri kino gihe ko bokwihangana mu kurindira yuko ibikorwa vyo gusanura ico kivuko ku buhinga bwa none bishobore gukorwa.
Uretse inyubakwa zishikiramwo ibidandazwa zavogerewe n’amazi y’ikiyaga, n’ahakorera abarongoye ico kiyaga haratewe n’amazi ubu hakaba hari bimwe mubidandazwa vyava mu bihugu nka Congo na Tanzania bitagica kuri ico kivuko vyaba ibijabuka canke ibiva muri ivyo bihugu nk’indagara zumye canke ibinyobwa vy’ihiguriro Brarudi.
Muri kigarama 2024 mu nama yahuje abarongoye commune Rumonge n’intumwa za banki y’isi, hapfunditswe ko iyo banki izotanga amafaranga yo gusanura ico kivuko. Vyari vyatangajwe ko ibikorwa vyo gusanura ico kivuko vyotanguye mu gice ca mbere c’umwaka wa 2025.
