Mu rubanza rw’ikibiriraho rwo kuri uyu wa kane igenekerezo rya 05 Kigarama 2024,sentare nkuru ya Rutana yahanishije umusore w’imyaka 22 gupfungwa imyaka 5 no gutanga ihadabu ry’amafaranga ibihumbi 500 y’amarundi akaba yagiriwe n’icaha c’urudandazwa rw’abantu .
Umunyororo w’imyaka 5 no gutanga ihadabu ry’amafranga ibihumbi 500 nivyo vyaciriwe umusore w’imyaka 22 mu rubanza rw’ikibiriraho rwashashe muri sentare nkuru ya Rutana imbere y’umutaga kuri uyu wa kane igenekerezo rya 05 kigarama 2024.
Sentare nkuru yamenyesheje uwo musore ko adatanze iryo hadabu azoca apfungwa ayandi mezi 30 iryo hadabu rigahebwa.
Sentare nkuru y’igihugu ya Rutana yagirije uwo musore avuka ku mutumba Bukinga komine Gitaramuka intara ya Karuzi icaha c’urudandazwa rw’abantu kuko yavuze ko aho yafatiwe ku mutumba wa Bugiga muri komine BUKEMBA muri iyo ntara ya Rutana yari afise abana 4 b’imyaka iri hagati ya 13 na 14 abajanye mu gihugu ca Tanzaniya hari kuwa 27 munyonyo ukwezi munyonyo .
Uyo musore yaburanye yemera icaha ariko akisigura avuga ko yari yabamutumwe n’umuntu ari muri Tanzaniya amwereye kumuhemba amashiringi 5000 ku mwana umwe wese amushikaniye.
