Sandrine Niyonkuru yari amaze igihe kitari gito mw’ihiganwa ry’abigeme mu gihugu ca Egiputa mu mugwi TUT FC na FC Masar akanabikora neza mu kwinjiza ibitsindo vyinshi, no mu gihugu c’Ubushinwa yatanguye kwinjiza ibitsindo mu mugwi mushasha.
Mu rukino rwiwe rwa mbere ari mu mugwi wiwe mushasha Changchun Dazhong Women FC, Sandrine yinjije ibitsindo 2 maze afasha uwo mugwi wiwe gutsinda Guangdong Meizhou mu rukino rwa Chinese Women Super League.
Igitsindo ca mbere, Sandrine Niyonkuru yacinjije ku munota wa 17. Ntivyagarukiye aho kuko yabandanije asatira cane aza no kubona igitsindo ca kabiri ku munota wa 91. Mu bitsindo bitatu uwo mugwi waronse akaba afisemwo ibitsindo bibiri.
Si ubwa mbere uwo musatirizikazi w’umugwi nserukira gihugu Intamba mu rugamba mu bigeme akinira muri kino gihe mu gihugu c’Ubushinwa mu mugwi Changchun Dazhong abikora mu kwinjiza ibitsindo vyinshi kuko no mu mugwi yahoramwo wo muri Egiputa ibitsindo yarabironka.
Sandrine Niyonkuru akaba yahora akinira umugwi ukina mu cicaro ca mbere mu gihugu ca Egiputa witwa TUT FC na FC Masar.
