Impaga umugwi Amasipiri Fc uheruka guterwa n’umugwi Olympique Star itumye FFB igabisha uwo mugwi.
Kuri uyu wa gatatu igenekerezo rya 22 Nzero 2025 niho igisata kijejwe gutunganya amahiganwa muri FFB cemeje ko umugwi LLB Amasipiri Fc watsinzwe impaga ( Forfait) y’ibitsindo 3-0 mu rukino rw’indwi igira 16 ruheruka kubahuza n’umugwi Olympique Star ku musi w’Imana uheze igenekerezo rya 19 Nzero 2025 i Buganda mu ntara ya Cibitoke.
Igisata c’amahiganwa mw’ishirahamwe ry’umupira w’amaguru kirongowe na Youssouf Mossi categetse umugwi Amasipiri Fc kiriha amafaranga angana n’ibihumbi amajana atanu ( 500,000FBU) y’amarundi nk’ihadabu hamwe no kuriha amafaranga yose yakoreshejwe mu nteguro y’urwo rukino harimwo ayo kwiyunguruza kw’abakinyi, abahagarikizi n’abandi.
Umugwi Amasipiri Fc wagabishijwe n’igisata c’amahiganwa muri FFB y’uko ni wahirara ugasubira gusiba ku kibuga uzoba ukuntuwe impaga igira gatatu ( Forfait) uzoca wirukanwa mw’ihiganwa rikuru rya Primus League. Aho rero ngo n’ibindi bihano birategekanijwe.
Impaga Amasipiri Fc uheruka guterwa na Olympique Star yari impaga igira kabiri uwo mugwi utewe, bisigura y’uko usigaje impaga imwe gusa kugira uce ufutwa mw’ihiganwa .
Mwomenya ko umugwi Amasipiri Fc mu nkino 16 umaze gukina uri mu kibanza ca nyuma n’amanota 6.
