Bain Turo n’agashavu kenshi avuga ko m’umuziki ndundi habamwo uguhemukirwa cane arivyo bica intege umuririmvyi. Ariko kubera ko uba ufise intumbero muri wewe bituma udasubira inyuma. Ngo hari n’abamenyesha makuru bamwe bamwe n’abandi bantu bagenda baravuga amajambo atari meza ku baririmvyi.
Ivyo kenshi ngo biratera icuka kitameze neza mu baririmvyi harimwo n’ugufatwa n’ingwara zo mu mutwe nk’uko vyashikiye umuririmvyi Tylo Six Demana bivuye ku majambo bamuvugako.
Bain Turo abandanya avuga ko n’ubwo biri uko badacika intege. Arahanura abantu bagenda bavuga nabi igikorwa c‘umuririmvyi kanaka ko bobihagarika kuko bataba bazi inguvu aba yarakoresheje kugira ngo ico gikorwa gisohoke. Agira ati : “Namba hariho ikosa babonye k’umuririmvyi boraba amajambo bokoresha kugira ngo ntibibabaze umurirmvyi canke ngo bimuce intege”.
Nayo ku kijanye n’indirimbo ”Tuza”, avuga ko yayikoranye na mungezi we B Rapha kandi ko bafise ama collabor menshi bagiye gukora muri uno mwaka.
B Rapha ashikiriza ko kuva aho batanguye kugira collabor na Bain Turo vyamuhaye kumenyekana cane gusumba uko yikorana wenyene kandi indirimbo zose bazikoze bavyifuza arivyo vyatumye igikorwa kiba ciza.
Bain Turo arasaba management kugira ngo ibikorwa vyiwe bigere kure. Arashimira abakunzi biwe ko baguma bamwitwararika mu kuja gukurikirana ibikorwa abasangiza ku rubuga rwiwe rwa youtube agahamagarira n’abatarabigira ko bonyarukira kuri urwo rubuga baryoherwe n’ibikorwa abashikiriza.
