Bamwe mu banyagihugu bo muri karitiye Kajiji zone Kanyosha muri komine Mugere intara ya Bujumbura bavuga ko batashimishijwe n’ingene amatora y’umukuru w’iyo karitiye yagenze.
Bidoga ko hari umwe mubo bari biteguriye gutora kandi banahaye amajwi yakuwe k’urutonde rw’abitoza ku munota wa nyuma, basaba umurwi CECI ujejwe gutunganya amatora gushira aho abo banyagihugu bashize mw’itora ry’uwugiye kurongora uyo mutumba.
Ni mu gihe bigaragara mu cegeranyo c’inama yokuwa 22 Myandagaro 2025 y’abagize umugwi w’intara ujejwe gutunganya amatora wiga ku birego vy’abunguruje ko bakuwe ku ntonde z’abitoza. Abagize umugwi mubo bahebuje harimwo uwari asanzwe arongoye karitiye ya Kajiji Ferdinand Minani uwo mugwi ukaba wavuze yuko umukuye k’urutonde rw’abitoza ku mvo z’uko afise abagore benshi.
Bamwe mu banyagihugu bo ntibemera ivyo yagirizwa basigura ko Ferdinand Minani ahubwo amaze imyaka ishika kuri 2 apfakaye kandi ataraganduka. Ikindi bavuga nuko mu kiringo amaze atwara yabatwaye neza ari naco coba catumye bamuhunda amajwi. Abakwirikiranye iharugwa ry’amajwi bo bemeza ko mbere ari nawe yaronse amajwi menshi gusumba abo bariko barahiganwa n’ubwo yari yakuwe ku rutonde rw’abitoza.
Bamwe mu banyagihugu bo mu Kajiji bavuga ko umugwi ujejewe gutunganya amatora muri komine Mugere niwatangaza ko ari uwundi yatsinze bashobora kwihereza amabarabara biyamiriza ivyavuye muri ayo matora.
Uwurongoye CECI Mugere we avugako atavyo azi akemeza ko kuri uyu wa gatanu ariho baza kumenyesha ivyavuye mu matora.
Ingingo ya 73 y’itegeko ritunganya amatora ritegekanya ko kuva amajwi y’imfatakibanza atangajwe uwufise ico abaza afise imisi 4 yo kwitura umugwi wigenga ujejwe gutunganya amatora muri komine uwo nawo ukishura mu misi 6 ikurikira.
Uwitwaye atashimishijwe n’ingingo yafashwe na CECI araheza akunguruza mu mugwi w’intara ujejwe gutunganya amatora mu misi 4. Umugwi CEPI nawo nyene ufise imisi 4 kugira ufate ingingo. Ico gihe umugwi CECI uraheza ugaca utanganza ibiharura ntabanduka ugaheza ukabirungikira umugwi w’intara CEPI.
