Ihiganwa rya Elite 16 mu karere ka Afrika y’ubuseruko mu mupira w’amaboko basketball ryari rimaze iminsi ribera mu gisagara ca Nairobi mu gihugu ca Kenya kuva kw’igenegerezo rya 27 Munyonyo 2024,ryarangiye kuri uyu wa 3 Kigarama,umurwi waserukiye Uburundi utahukanye ikibanza ca gatatu.
Muri iryo higanwa rihuza imigwi yabaye iya mbere mu bihugu vyayo mu nkino za basketball ;imigwi ya Nairobi City Thunder yo muri Kenya na KriolStar yo muri Cap Vert yatahukanye ibibanza vya mbere na kabiri ivyo. bikaba bibaha n’uburenganzira bwo gukina inkino za Basketball Africa League(BAL)2025.
Umugwi Urunani BBC ukaba watahukanye ikibanza ca 3 inyuma yo gutsinda City Oilers Basketball Club wo mu gihugu ca Ouganda (77-75).
Mu gihe atakindi gitangaza kidasanzwe coboneka umurwi w’Urunani BBC ntukironse uburenganzira bwo gukina inkino za BAL nk’umugwi wa gatatu witwaye neza gusumba iyindi bivanye nuko umugwi wa ABC Fighters wo muri Côte d’Ivoire ushobora guhabwa ico kibanza ca 3 mu nkino nkizo za Elite16 zo mu gice c’uburengero bwa Afrika inyuma yo gutsinda Kadji Sports Academy yo muri Cameroun(92-53) ariko uwo mugwi mu nkino za mbere wakinye watakaje zibiri mu gihe Urunani wataje urukino rumwe muri gice ca kabiri gishira ica nyuma.
Kugeza ubu ntiharamenyekana umugwi uzotahukana ikibanza ca gatatu hagati y’umugwi Urunani na ABC Fighters wo muri Côte d’Ivoire.
Umugwi Urunani wari waronse ubwo burenganzira bwo kwitabira izo nkino za Élite 16 inyuma yo gutsinda umugwi Dynamo BBC wo gihugu c’Uburundi muri Playoffs uca uronka uburenganzira bwo kwitabira inkino za Elite 8 zabereye mu gihugu ca Tanzaniya ari naho wahavuye uronkera ubwo burenganzira bwo kuja mu gihugu ca Kenya.
