Mu bihugu bigera ku majana abiri na cumi, Uburundi bwisanze mu kibanza c’ijana na mirongo ine ku rutonde rwasohowe n’ishirahamwe ry’umupira w’amaguru kw’isi FIFA.
Ivyo bibaye inyuma y’inkino zibiri Uburundi bwakiniye mu gihugu ca Maroc aho urukino rwa mbere bwakinye na Côte d’Ivoire, Uburundi butsindwa igitsindo kimwe k’ubusa, urukino rwa kabiri butsinda Seychelles ibitsindo bitanu k’ubusa.
Ku rutonde rwaheruka gusohoka kw’igenegerezo rya 19 Kigarama 2024, Uburundi bwari mu kibanza c’ijana na mirongo itatu n’icenda.
Ibihugu bihagaze neza biri mu karere ka Afrika y’ubuseruko ni RDC kiza mu kibanza ca 61, Uganda mu kibanza ca 89, Tanzaniya mu kibanza c’107, Kenya mu kibanza c’111, Urwanda rukaba rukaba ruri mu kibanza c’130. Ni mu gihe igihugu c’Uburundi kiri mu kibanza c’140.
Ivyo bikaba bibaye inyuma y’izo nkino zibiri zo kurondera uburenganzira bwo kwitabira inkino z’igikombe c’isi 2026 zizobera mu bihugu bitatu Canada, USA hamwe na Mexique.
