Umugwi NGOZI CITY wafashe ingingo yo guhagarika vy’imfatakibanza umumenyereza HARUSHA Mohamed ikiringo c’amezi atatu.
Uwo mugwi ukaba wagiriza umumenyereza w’uwo mugwi Harusha Mohamed kutazana icuka ciza mu bakinyi n’abarongozi b’uwo mugwi, inyifato mbi yo gushaka gucafuza ishusho y’umurwi Ngozi City, kuba vyaramunaniye guhoyahoya imishamirano y’abakinyi yabereye ku kibuga Urunani aho umukinyi Bosco yashwana na mugenzi we, kuba atigeze afasha ngo agwanye ivyo gutigira vyavurwa mu bakinyi b’uwo mugwi. Bamwagiriza kandi kudatanga umwimbu ushimishije kuva igice co gusubiriza (Phase retour) c’ihiganwa Primus League gitanguye.
Uburongozi bwa NGOZI CITY bukaba bwafashe ingingo yo ku muhagarika amezi 3. Ubwo burongozi bukaba bwaciye bufata ingingo yo gushiraho uwahora ari icegera ciwe NSENGIYUMVA J Marie batazira KAPPADY akaba ariwe agiye kuba aramenyereza uwo mugwi muri ico kiringo.
HARUSHA Mohamed akaba asize umugwi NGOZI CITY mu kibanza c’icenda n’amanota 36 mu nkino 24.
