Aho hambere, abantu bararonka umwanya wo kugenderanira, kuganira no gusangira ivyiyumviro. Ababanyi baricara hamwe ku mugoroba, imiryango igasangirira hamwe imfungurwa kandi abantu bagafashanya mu buzima bwa misi yose. Ariko muri iki gihe, ibintu bisa n’ivyahindutse.
Hari abantu babana mu nzu imwe ariko umunsi wose nta kiganiro kinini bagirana. Hari ababanyi bamara amezi batazi uko bagenzi babo babayeho. Abandi bavuga ko ubu umuntu wese aba yibereye muri téléphone yiwe canke mu buzima bwiwe bwite.
Benshi babona ko téléphone n’imbuga ngurukanabumenyi vyahinduye uburyo abantu babana. Ubu umuntu ashobora kumara amasaha menshi kuri Facebook canke TikTok ariko ntabone umwanya wo kuganira n’abo bari kumwe.
Ubuzima bugoye nabwo burabigirako ingaruka. Abantu benshi baba bahugijwe no kurondera amafaranga, kwiruka ku kazi canke ku buzi, gushaka uko umuryango ubaho. Ivyo bituma bamwe baruhuka batagifise inguvu zo kuganira canke kugenderera abandi.
Ariko kandi, abahinga bavuga ko kuganira no kwegerana bifise akamaro kanini mu buzima bw’umuntu. Birafasha kugabanya agahinda, gukomeza imigenderanire no gutuma umuntu yumva afise abantu bamwitwararika.
Hari n’abavuga ko ikibazo kitari telefone gusa, ahubwo ko abantu benshi bagenda batakaza urukundo, ukwizigirana n’umuco wo kwitaho abandi.
Naho ubuzima bwahindutse, abantu benshi bemera ko ata kintu gisumba ikiyago ciza, urukundo n’ukwegerana hagati y’abantu.
