Umuririmvyikazi Natacha Ngendabanka ,inyuma y’ikiringo hafi c’amezi atatu Ku mugabane wa Buraya agiye gutunganya ibikorwa bitari bike harimwo gusohora indirimbo nshasha imbere yuko umwaka wa 2024 urangira.
Akigenda i Buraya Natacha Burundi yagiye aherekeje abana biwe babiri Giulio Frojo hamwe na Leila Frojo aho bari bagiye gutangura amashure,bamwe mubegereye uyo muririmvyi bemeza ko yashitse mu Burundi kuva kuri uyu wa kabiri igenekerezo rya 26 Munyonyo umwaka wa 2024 kugira abandanye n’ibindi bikorwa vyiwe vy’umuziki.Kimwe mu bikorwa Natacha La Boss agiye gushira ahabona harimwo gusohora indirimbo yiwe nshasha igiye kurangiza umwaka wa 2024 inyuma yaho aheruka gukora indirimbo Kule. Abasanzwe bafasha Natacha ibijanye no gutunganya umuziki (management) bemeza kandi ko hari n’igiteramo kirangiza umwaka 2024 agiye gukora mu ntumbero yo kurangiza umwaka wa 2024 neza.
Aha kandi naho yari I Buraya uyo muririmvyi ntiyari areze amaboko kuko ibikorwa vy’umuziki vyarabandanije kuko yanatanze challenge kubakunzi biwe ku ndirimbo yise “Kule”mu ikiringo c’ukwezi kwose araheza aratanga agashimwe ku wabaye uwa mbere ho yatahukana umuriyoni mu mafaranga y’amarundi uwa kabiri aronka ibihumbi amajana atandatu.
Ikindi gihambaye n’uko La Boss Natacha asanzwe ari mw’ihiganwa ritegurirwa mu gihugu ca Zambiya k’ubaririmvyi bo muri Afrika, Natacha akaba ariwe yaserukiye Uburundi mu mice 3 yiryo higanwa ryitwa
“Zikoma awards ” rigiye kurangira vuba ubushimwe bukazotangirwa mu gihugu ca Afrika yepfo mu gisagara ca Johannesburg kw’igenekerezo rya 30 Munyonyo 2024.
