Abakinyi ba Man City biyemeje gusubiza abafana amafaranga barishe mu kuraba urukino inyuma yo gutsindirwa muri Norvège.
Umugwi wa ba kizigenza (capitaines) ba Manchester City ari bo Bernardo Silva, Rúben Dias, Erling Haaland na Rodri basubije amafaranga angana n’amapawundi y’abongereza 9 357 y’amatike y’abafana 374 baherekeje uwo mugwi mu rukino watsinzwemwo 3–1 na Bodø/Glimt wo muri Norvège.
Mu majambo bashikirije bagize bati: “Abafana bacu ni kirumara cane kuri twebwe. Turazi ingene bitanga iyo bagiye kudushigikira hirya no hino kw’isi, haba ku kibuga cacu canke hanze, kandi ntituzokwigera tubifata nk’ibisanzwe. Ni bo bafana ba mbere beza kw’isi.”
Abo bakinyi bongeye kandi bagira bati: “Turazi kandi ko urwo rugendo rwari rurerure kandi rukomeye ku bafana badushigikiye mu mbeho irenze urugero, n’ijoro ritari ryoroshe kuri twebwe mu kibuga. Kwishura amatike y’abafana bagiye i Bodø ni co ca mbere gito cane dushoboye kubakorera.”
Abakinyi ba Man City bavuze ko biteguye kugwana ku musi wa gatandatu uza mu rukino ruzobahuza na Wolves, hamwe no ku wa gatatu w’indwi iza aho bazokina na Galatasaray ku kibuga ca Etihad.
