Perezida wa Kenya, William Ruto, yatangaje ko abanyamahanga bakora ubudandaji buto buto, harimwo n’abatembereza ibidandazwa mw’ibarabara, batazokwongera gukora iyo mirimo muri Kenya guhera ku wa mbere, itariki 7 Nyakanga 2026.
Perezida Ruto yabivugiye mu nama yagiranye n’abaserukira imigambi n’amashirahamwe y’abikorera utwabo, cane cane abari mu rudandazwa ruto ruto. Iyo nama yabereye ku kirimba c’umukuru w’igihugu ku wa gatatu igenekerezo rya 02 Nyakanga 2026.
Ruto yavuze ko Kenya imaze igihe ifata ingingo zo guteza imbere ubutunzi no gufasha abanyagihugu kwironsa akazi n’ivyinjiza. Yashimangiye ko izo ngingo zitafashwe kugira ngo zitere akaryo abanyamahanga ko kuza muri Kenya gukora ubudandaji buto buto.
Ati: “Twaragize utwigoro two guteza imbere ubutunzi. Ntitwabikoze kugira twongereze icizere c’abanyamitahe kugira ngo abatembereza ibidandazwa mw’ibarabara baze muri Kenya.”
Ayo majambo yakiriwe n’amashyi menshi n’abari bitavye iyo nama.
Perezida Ruto kandi yavuze ko hari integuro yashikirijwe Inama Nshingamateka ya Kenya igamije gutomora neza urutonde rw’imirimo y’ubudandaji abanyamahanga batazokwemererwa gukora.
Ariko, Ruto yasavye abari muri iyo nama kutirindira ko iyo nteguro yemezwa, kuko ingingo yo guhagarika abanyamahanga gukora ubwo budandaji buto buto izotangura gushirwa mu ngiro kuva ku wa mbere, itariki 7 Nyakanga 2026.
Iyi ngingo iza mu gihe Leta ya Kenya ivuga ko ishaka kurushiriza gukingira no guteza imbere ubudandaji bukorwa n’abanyagihugu bayo, cane cane urudandazwa ruto rufasha imiryango myinshi kwironsa amafaranga yo kubaho.
