Uwuserukira ishirahamwe OLUCOM ryitaho kugwanya ibiturire n’isesagurwa ry’amatunga ya reta mu Burundi,avuga ko gushika ubu icaturiye isoko nkuru ya Bujumbura yadukamwo umuriro cobazwa reta ubwayo kuko kitaramenyekana.
Imyaka ishika 12 irarangiye isoko nkuru yo mu gisagara ca Bujumbura ihiye igatokombera aho gushika ubu atamuntu numwe aramenya icatumye haduka umuriro muri iryo soko.
Gabriel Rufyiri arongoye ishirahamwe OLUCOM mu kiganiro yahaye abamenyeshamakuru avuga ko ivyahiriye muri iryo soko bingana n’ibice mirongo ibiri kw’ijana(20%)vy’ubutunzi bw’igihugu mu gihe hakorera abakozi barenga 5000 ivyo bikerekana uruhombo igihugu cagize bivuye kuri uwo muriro.
Rufyiri avuga kandi ko mu gihe reta yari ibonye ko isoko ihiye hari ibikorwa yategerezwa guca ikora, agira ati:”leta yategerezwa gutegeka abadandaza bose kuja muma assurance, gushira inzira mu masoko kugira haboneke ahaca imodoka zijejwe kuzimya imiriro, kwama hategekanije imodoka zizimya umuriro, ariko kubona ivyo vyose bitakozwe bisigura ko atacigwa twigeze dukura mu vyabaye”.
Muri OLUCOM kandi basaba reta gushiraho umugwi wigenga ujejwe kuraba icatumye amasoko asha kubera ngo gushika ubu abarundi bataramenya icaturiye isoko nkuru ya Bujumbura ndetse n’ayandi masoko yahiye inyuma yaho.
Ku vyerekeye ibikorwa biriko birategurwa n’ishirahamwe Ubaka Nation vyo gusubiramwo isoko nkuru ya Bujumbura, Rufyiri avuga ko itunganywa ry’ivyo bikorwa vyobazwa reta bikareka kubazwa Fabrice Manirakiza asanzwe umudandaza avuga mu kibanza cayo kugirango reta yerekane itandukaniro riri hagati ya Ubaka Nation hamwe n’ayandi mashirahamwe yaje imbere yayo kuri ico gikorwa.
Gabriel Rufyiri asaba abajejwe abandi mu badandaza bahoze bakorera mw’isoko nkuru ya Bujumbura kuja muri OLUCOM kugira bafashanye n’iryo shirahamwe gukurikirana gushiramwo imitahe muri iryo soko,kuraba ko biriko birakorwa neza hamwe n’ingene bazoronswa ibibanza.
