Leta ya Brazil yatangaje umugambi uzotwara hafi imiliyoni 444 z’amadolari ya Amerika mu guteza imbere ubuhinga bw’ubwenge buhingurwa na mudasobwa, buzwi nka Artificial Intelligence (AI).
Uyu mugambi ugamije kongera ubushobozi bwa Brazil mu bijanye n’ubuhinga bwa none, cane cane mu bijanye no kubika no gutunganya amakuru menshi, guteza imbere imashini zikoresha AI no kugabanya ukwizigira ku buhinga buva mu bindi bihugu.
Muri ayo mafaranga, hafi miliyari 1.3 z’amareal, ni ukuvuga hafi miliyoni 251 z’amadolari, azoshirwa mu mugambi wo kwubaka ibikoresho bikomeye vya mudasobwa (supercomputers) mu gisagara ca Rio de Janeiro. Uwo mugambi uzokorwa bafatanije n’amashirahamwe yo mu Bushinwa, harimwo Huawei na iFlytek, kandi uzofasha mu gukora no gutoza imice ya AI ishobora gukoreshwa mu bikorwa bitandukanye.
Izindi miliyari 1 y’amareal, hafi miliyoni 193 z’amadolari, azokoreshwa mu kugura no kwubaka iyindi mudasobwa y’ubushobozi budasanzwe izoshirwa muri leta ya Rio Grande do Norte, mu buraruko bushira ubuseruko bwa Brazil. Leta ivuga ko iyo mashini ishobora kuba mu mashini 10 zikomeye cane kw’isi mu bijanye no gutunganya ibikorwa vya AI.
Brazil irashaka kwigenga mu bijanye na AI
Perezida wa Brazil, Luiz Inácio Lula da Silva, n’ubutegetsi bwiwe bavuga ko intumbero atari ukwigarurirwa n’igihugu kimwe canke ishirahamwe rimwe mu bijanye n’ubuhinga. Ni co gituma Brazil yahisemwo gukorana n’abashoramari n’amashirahamwe yo muri Amerika no mu Bushinwa.
Leta kandi irateganya gukorana na Espagne mu guteza imbere ibikoresho bikorerwamwo imashini za none (semiconductors), guteza imbere ububiko bw’amakuru bwa Brazil bukorera kuri internet (cloud computing), hamwe no gushinga ikigo kizokurikirana ko AI ikoreshwa mu buryo buboneye kandi bwizewe.
Bitegekanijwe ko imwe muri izo mudasobwa zikomeye izoba yatanguye gukora mu mpera za 2027.
